2014 Bacchus Ruud I


Sjaaaaleeeee en knalklommele…. Mesjien zaet ug det waal get. Zo neet, dan kómp geer d’r mesjien nog waal achter. 2 jaor geleje bön ich adjudant gewaes biej De Haofgengers van Prins Loek I. En aafgelaupe sezoen waas ich veur ‘t eerste jaor biej de Bacchusklup van Remunj. Dao höb ich mich bezig gehaoje mit sjaale aan ug te verkoupe en aaf en toe knalde ich eine party popper de loch in.


Ich bön al ein paar keer gevraog door de Kemissie van “wieze” here om Bacchus te waere. Echter toet 2012 waas ich drök bezig mit sjtudere naeve mien baan, en höb ich sjteeds de boot aafgehaaije. Toch begos ‘t te kriebele en höb ich der aan toe gegaeve om Bacchus 2014 te waere. Woor Frans 1 veurig jaor de juubelaris Bacchus waar, moog ich noe ‘t 6x11 Juubeleijemfees van ós Klup mitviere es Bacchus. Ich haop dit allemaol op ein sjoon meneer te moge ervare mit jonk en aad. Woor biej de jeug de toekoms haet, en ich dao zoväöl meugelik biej aanwezig probeer te zeen.

Van origine bön ich ein dörps menke en waal vanoet ut Daole-riek in Hirkebosj, woor ich vanaaf 1981 opgegreujd bön. Vanaaf 2005 woon ich echter in ‘t riek van D’n-Uul. Vanoet Hirkebosj en Remunj bön ich bienao altied waal in Remunj te vinje gewaes mit de vastelaovend. In de jaore 2010 en 2011 waar ich echter in Brazilië te vinje en höb ich in ‘t noorde van Brazilië de Braziliaanse Vastelaovend, of wie men dao zaet, Carnaval, moge ondekke. Auch ein sjpektakel, helaas is ‘t hiej te kaat om ‘t te laote lieke wiej dao. 

Nao 32 jaor, bön ich nog sjteeds neet aan un dame veur vas blieve plekke, dus helaas kin ich dan auch nemes es vrouw of vriendin introdesere, ich bön dan auch nog get meer op mien adjudante aangeweze. Ut zeen der ein aantal, maar net wiej eederein zeen die auch drök mit van alles en mótte ze maar kieke wie ze mich in toom gaon haaje.......of neet......

In eeder geval moog ich ug veursjtelle aan:


Veur de kos, weik ich biej ‘t hoofkwarteer van Europa in de buurt van Hamburg van ein Japans bedrief wat in de hanjel van middiese laboratorium instremente duit. Ich haaj mich dao bezig mit Merger & Acquisitie van nuuj firma’s of simpel gezag ‘t kaupe, fusere of opsjtarte van nuuj bedrieve. Veur dees baan riej en vleeg ich dan auch euver de waereld, en dit zal ich auch tusse de vastelaoveswiekende door moge blieve doon. Haopelik kump ‘t neet veur det eine vleger pech haet, en ich ein wiekent mót euversjlaon.
Es geer kint zeen reis ich gaer en väöl veur ‘t wirk, maar auch veur fekansiej. Ich höb väöl gezeen en zal auch nog waal meer gaon zeen, maar nao 8 fekansiejs in Brazilië kin ich auch zégke det dao toch waal ein sjtök van mien hert lik. Van dao det ich auch zal perbere om ein bietje Carnaval, op zien plat gezag Vastelaovend, mit euver te bringe nao ‘t Remunjse en Limburgse landj, ónger de sjpreuk “DOR DE CABEÇA”. Ich haop det geer dao weinig las van zult höbbe nao eine daag mien zangsjtum en pilskes te höbbe moge trotsere. Es geer d’r toch las van höb dan sorry veur mien sjtum, maar de pilskes höb geer toch zelf gedronke.

Väöl plezeer en eine sjoone vastelaovend mit of zonger “DOR DE CABEÇA”...........

Bacchus Ruud I


Bas Ruijten


Bacchus Ruud is Miene óngerbuurman en ich zal dan auch 't meiste op hem mótte lette ónger 't sezoen. Ich kom oorsjprunkelik van "oppe Ruiver" woor ich al van kleins af aan mit de optoch mit deej wiej praalwages boewe, Sins 1996 woon ich in 't Remunjse en vier ich vastelaovend neet meer oppe Ruiver maar in Zjwame woor väöl vrunj van mich vanaaf kómme. Dao zeen veer dan auch ein 7 jaor geleje gesjtart mit "Bacchus Zjwame" waat zeer hertelik ontvange is door veural de jeug. Zelf bön ich veurzitter van Bacchus Zjwame. In 't dageliks laeve wirk ich biej Nebim (Volvo & Renault truck dealer) es regelnaef (Service coördinator). Brandjwaer sjtruimp door mien blood en daoveur bön ich zeer väöl te vinje rondjom de sjoonste Brandjwaer kazerne van Limburg woor ich dan wachdeenste dreij biej de collega's van Brandjwaer Remunj.

Mit de Bacchus klups make veer der ein sjenjig sjoon fees van.

adje Bas

Sander Janssen

Ich bön Sander Janssen de broor van eur nuuje Bacchus Ruud 1. Ich bön 34 jaor jonk en woon aan de angere kantj van de Maas in Häör. Ich woon dao samen mit mien vriendin Lotte.

Veur de kos wirk ich op de Finance aafdeiling biej Faurecia in Remunj.

Op 't moment wie Ruud mich vraog adjudant te waere, waas de keuze sjnel gemaak, ondanks det ich de letste jaore get minder vastelaovend vier wie vreuger, vinj ich 't ein grote eer om adjudant biej de Bacchusklup te zeen. Vreuger ginge Ruud en ich väöl same op paad, jaore lank waas der ein geweldig kombienasiej van Zoepkoel in Venlo om daonao nao de Sjtasiefestasie in Remunj te gaon. Auch zeen veer waal ins in Mesjtreech oppe zóndaag biej de Bonte Sturm belandj.

Ich kiek der nao oet om de vastelaovend mit de Bacchusklup te moge vieren en bön benuudj wie 't der dao allemaol aan toe geit. Maar ich haop veural det geer same mit ugge Bacchus van 2014 der ein sjoon sezoen van gaot make, waovan veer mit z'n alle kinne genete. En mesjien is dit waal de letste vastelaovend dae Ruud hiej geit mitmake veur der nao zien Druimlandj Brazilië geit verhoeze. Ich haop nog ff get langer van hem te kinne genete, maar de kans is waal aanwezig.....

Dus op nao ein topjaor, sjoone vastelaovend same.

Sander

Barry Lutgens

Daag miense. Barry Lutgens is miene naam en wiej de meiste van uch weite, bön ich Bacchus gewaes in 2012. Ich bön 32 jaor en al 15 jaor gelökkig same met mien vriendin Sandra Vaessen oet Zjwame. Ich bön de trotse vader van Gigi, Luka en Numi.

Nao mien jaor es Bacchus, höbbe ze mich gevraog om biej de klup te kómme, woor ich veurig sezoen in 't jaor van Bacchus Frans I es bacchusklup lid eine sjoone en maelige tied höb gehad.

Waat doon ich veur de kos.

Ich höb ein eige bedrief geneump: 'Van A naar Barry' (van a naar beter) Hiej wirk ich mit luuj die aan de ongerkantj van de maatsjepiej laeve. Dink auch bv. aan jongere en hangjongeren en luuj die hulp neudig höbbe mit van alles en nog get.

Daonaeve run ich same mit mien bruurke Kevin (adjudant) 't sjoonmaakbedrief 'Schoonmaakbedrijf Lutgens' Veer make eigelik alles zuuver van A toet Z en drage zo auch ós sjteinke biej om Remunj zuuver te haje.

Verder is miene naam auch nog gekoppelt aan:
'Echt Werken Werkt'
'Stichting Op Dreef'
'Stichting Shit Job'

Mit Bacchus Ruud I gaon veer d'r ein sjoon en maelig sezoen van make.

Barry

Loek van den Brand

Ich dink det de meiste luuj mich waal al ein beitje kinne. Ich loup al ein aantal jaore ( sins 2006 ) mit biej de Bacchuskup. In 2012 bön ic hein jäörke weg gewaes omdet ich toen prins waas van De Haofgengers.

Ich bön in 1982 gebaore in ‘t riek van de Oeles, via ‘t riek van Hopsjlokkers en D’n-Uul woon ich noe same mit Janneke in ‘t riek van de Watterratte.

Veur de kos wirk ich biej SeaChange. Dao klommel ich get mit kompjoeters en zorg der veurnamelik veur det geer TV kint kieke… Op zóndaag bön ich al jaore te vinje op de hockeyveldje van Remunj, woor ich same mit väöl aad Bacchusse en Prinse in ein sjoon team sjpeel.

Ich höb der in eeder geval zin in, ich dink det ich mien henj waal vol höb aan deze Bacchus, dae ich altied, leefkozend “beermesjien” neum! Neet te sjtoppe….

Loek